Si ta ndihmosh dikë

Shpesh gruaja i tregon së pari nënës, motrës, një shoqeje ose një fqinje. Mënyra si reagon ti mund të bëjë dallim të madh.

Nëse e dëgjon ose e sheh dhunën tani, thirr policinë. Kosovë 192, Shqipëri 129, 112

Çfarë të bësh

Dëgjoje dhe besoje. Mos e vër në dyshim atë që tregon.
Thuaji që nuk është faji i saj. "Nuk e meriton këtë. Nuk je vetëm."
Pyete çfarë i duhet. Mos vendos ti për të.
Ofro ndihmë konkrete: ta ruash çantën me dokumente, të jesh personi me fjalën e kodit, të kujdesesh për fëmijët.
Shoqëroje. Te një strehimore, një qendër grash, te mjeku ose në polici. Një grua që nuk shkon vetëm trajtohet shpesh ndryshe, sidomos në polici. Kur policia nuk ndihmon.
Jepi numrat në mënyrë të sigurt. Kujdes të mos i ruash në telefonin e saj me emra që ai mund t'i dallojë.
Ji e durueshme. Shumë gra largohen pas disa përpjekjesh. Qëndro pranë saj edhe nëse kthehet.

Mos e fajëso dhe mos e pyet "pse nuk ike?".
Mos i thuaj "duro për hir të fëmijëve" ose "kështu janë burrat".
Mos u përball vetë me dhunuesin. Kjo mund ta rrezikojë edhe më shumë atë, edhe ty.
Mos i trego askujt pa pëlqimin e saj, përveç kur ka rrezik për jetën.
Mos e detyro të largohet para se të jetë gati. Koha e largimit është shpesh më e rrezikshmja.

Edhe ti mund të marrësh këshilla se si ta ndihmosh. Ose kontakto një strehimore në Kosovë ose në Shqipëri.

Printo karta të vogla me numrat e ndihmës dhe lëri në banjat e grave, te mjeku, në farmaci ose në sallone bukurie. Printo kartat.